ភ្នំពេញ៖ ក្រសួងការបរទេសឱ្យដឹងថា «ញញួរ» តំណាងប្រធានអាស៊ាននឹងត្រូវប្រទេសព្រុយណេប្រគល់ជូននាយករដ្ឋមន្ត្រីកម្ពុជា សម្ដេចតេជោ ហ៊ុន សែន នៅចុងខែតុលានេះ។
ក្នុងសេចក្ដីប្រកាសព័ត៌មានចុះថ្ងៃទី២៥ ខែតុលា ឆ្នាំ២០២១ ក្រសួងការបរទេសឱ្យដឹងថា ប្រទេសព្រុយណេនឹងប្រគល់តំណែងប្រធានអាស៊ានឆ្នាំ២០២២ ជូនព្រះរាជាណាចក្រកម្ពុជានៅថ្ងៃទី២៨ ខែតុលា ឆ្នាំ២០២១ ខាងមុខ ហើយសម្ដេចតេជោ ហ៊ុន សែន ក៏នឹងមានបទអន្តរាគមន៍ផងដែរនៅក្នុងពិធីទទួលនេះ។
អ្នកនាំពាក្យក្រសួងការបរទេសលោក កុយ គួង បានឱ្យEAC News ដឹងថាទោះជាកម្ពុជាទទួលញញួរប្រធានអាស៊ានពីព្រុយណេនៅចុងខែតុលានេះក៏ដោយ ក៏ព្រុយណេនៅតែជាប្រធានរហូតដល់ដំណាច់ឆ្នាំ២០២១។ លោកបញ្ជាក់ថា កម្ពុជាធ្វើជាប្រធានអាស៊ានចាប់ពីថ្ងៃទី១ ខែមករា ឆ្នាំ២០២២។
កម្ពុជាក្លាយជាសមាជិកអាស៊ានទី១០ នៅថ្ងៃទី៣០ ខែមេសា ឆ្នាំ១៩៩៩ កម្ពុជាធ្លាប់ធ្វើជាប្រធានប្ដូរវេនអាស៊ាន២ដងរួចមកហើយ។ លើកទី១ នៅឆ្នាំ២០០២ និងលើកទី២នៅឆ្នាំ២០១២៕